قرنتية - هاشم صديق

قرنتية

لا دبابة برمائية

لا جاسوسة مدسوسة

لا غواصة روسية

لا جندية في حركة

لا مختلسة مال شركة

لا قصفت حدود فشلا

لا كسرت صريف كسلا

ولا معروفة ختمية 

قرنتية

لا صعلوكة لبست شورت

لا بتعرف شنو البظبورت

لا محتاجة جنسية

هي قايلة النيل سقف بيتا

وقايلة ضفافو محمية

جات منسابة عز الصيف

قايلة الناس بكرمو الضيف

قايلة النيل أمان والقيف

وقايلة الحاضرة عصرية

قرنتية

جات بصغارا دايرة الخير

لا شافت يفط تحذير

لا نزحت تكوس توزير

لا جاطت حركة السير

لا درات وسام تقدير

لا مستغلة عشرين وش

ولا بتعرف تعيش بالغبش

كان محتاجة بس للقش

وجات أحلامها دوغرية

قرنتية

لا بلعت عديل السوق

لا نضمت بدون طايوق

لا كنزت دهب أمو ماس

لا ظلمت بدون إحساس

لا عصرت شباب الناس

لا كتمت على الأنفاس

لا قطعت عشم بي فاس

لا داستنا زندية

قرنتية

لا دست سلع في الخيش

لا شربت مريسة العيش

لا ضبطوها في التفتيش

لا سجنوها شالو الفيش

لا خانت قسم أوديش

لا اجتمعت بمستر جون

لا أكلت مونة العون

لا سدت علينا الكون

لا سبت كتاب أو دين

لا سامتنا حمرة عين

ولا باعتنا ضهرية

قرنتية

جات مشتاقة للخرطوم

تزور أحبابها خايفة اللوم

تصيح وتنادي بالحلقوم

جنينة النزهة وين يا زول؟؟

لقت حال الجنينة خلا

حليل زمنها وحليل أهلها

لا قرنتية لا أصلة

لا صوت كوكو

لا بغلة

لا حلوف

ولا أسداً مهاب بالخوف

لا نمراً يشد الشوف

لا ضل فيل

لا تتيل

جريهو جميل

ولا غزلان ولا طاووس

يباهي النيل

لا زفة طيور ونعام

لا نمراً دفر قدام

كل الشلة يا غرنتية غمضة عين

أحالوهم لصالح عام

تقول الدنيا مهدية!

قرنتية

جت زي ضيفة ما غارة

لا محتاجة لي فيزا

ولا تصديق على زيارة

جات والشوق دموع حارة

تجدد في العيون الشوف

بين توتي وعلالي أبروف

قايلة الدنيا لسة سلام

ما خيم زمان الخوف

ولسة هناك ضعاف حرة

ما مطمورة للمرة

قايلة الناس بعزو الضيف

ما بسوقوهو لي حفرة

وجوار القيف

ما بيكلوهو في السفرة

ومصيرو مخيف

قايلة الحاضرة ما غابة

وقايلة حقوقها محمية

قرنتية

لا قدلت في شارع القصر

لا حامت في وقت الحظر

لا خشت على المأمور

ولا نطت سلك أو سور

لا دخلت على أمدرمان

ولا كسرت قفل دكان

لا دفرت على التلفاز

لا عضت كراع فنان

لا ذاعت بيان للناس

لا احتلت كمان حيشان

ولا نصبت شبك للحش

جات بصغارا كايسة القش

تلاقي القوت

صبح محظور

وخير البقعة جوا السور

سماحة الدنيا منسية

قرنتية

لا بتعرف عجن أو لخ

وجات أحلاما دوغرية

عجب ساقوها جوة الفخ

عجب من طولها وقعت تخ

عجب سلخوها صبحية

عجب

ونحنا

بنسلخ الانسان

كيف ما نعذر الحيوان

عجب والدنيا عصرية!!

قرنتية

لا دبابة برمائية

لا جاسوسة مدسوسة

لا غواصة روسية

لا جنيدة في حركة

لا مختلسة مال شركة

ولا حزبية بعثية!!